SABAY KUYA

Kisahni Sabay Kuya atau wawakhahan say bakhih, biasani dicakhitakon Jamma Tuha diwaktu haga peddom, dalih ngayid-ayid, ngababekkom culuk cukud, togok di ngilik-ilik badan, na hak khadu makhanginda kaban-ni sanak so.
Wawakhahan selalu dipapennah sanak dijaman saka, ulih dinana makkung wad sarana hiburan khayya kinjuk TV, Game ataw say bakhihni.

Ajoya kisahni

Asuq dikhimba khakkos dillom pullan tuha, wad Kuya muinday jama Bekhuk, mak bakhih say ngabatangko tiyan khua sabetti-an, yaddoda ulih khisok putungga.
Kalapahni Kuya say isud-isud jawoh bubida jama Bekhuk say makellakh, luccak middija dudi, kakala Ya datas kayu, wad tattangni Ya khaggoh nyeppok kani-an ataw middi way nginum.
Teggi khani musim kamakhaw, Bekhuk ngaban tukhun nginum di way, mawad hak nginum khayya, wad say tuppak sellom, lamon moneh say bagukhaw dibiding way khik datas batu.
Manom khani kaban-ni Bekhuk no jinna sahahenna-an moloh cakak datas batang, bugayud nattay pappang, jak batang say middi batang say bakhih, laju kukhuk lom tengah khimba.
Di way khangni tiyan ngimum jinna khadu moloh hiyon, tinggal cakhaccahni way say kagahasa. Mak jawoh jak isan, munggak cutik, wad anakni Bekhuk lagi sanemmon mayin way, mawadda hak dihakhi koni, kik Ya no takacekh jak say khamik.
Sebbik hatini bakhong Ya ngakhilong meddoh, Ina Bapakni khik say bakhih khadu mak lagi disan.
Cungak khilong Ya cakak jak way, mepekh dihantakhani batu,ngison khik khabay pangkhasani.
Khani khadu kellom, hani hatini, dipa pay do Inaku jinna.
Busuya suwa khabay katutuk jak jawoh Ya nengngis gahasani Kucing pullan, haga mati do nyak jo hani.
Bettoh api kalagi, takellay bugayud di Ina, bang tanno tinggal nanggalan. Haga cakak batang say balaq mak dapok, Ya makkung panday. Induh khadu pikha kali Ya takusukh, ngahahakkod batang mak juga mingan, kalemmohan laju nganyap dihantakhani banekh.
Kammak ni la Bekhuk anak, makkung dihaluni haga nyeppok batang say malunik.

Bekhuk lunik no jinna gellakhni Ambin.

Pagi khani goh ayukni, mata khani mulay nyakhaccang, bukhung pattun satimbal-timbalan, khanno moneh pappang ni kayu, bukellay disasebbu angin.
Ambin minjak jak balik banekh, bettoh mak katahan, kidang mak jawoh jak isan wad batang hakha. Ambin lapah middiya ngodok hakha messak tikhahni kakebbang jinna bingi, khadu jak siya, molohya nutuq luyudni nambi tukhun middi way, pagun Ya cungak khilong ngakhakhiyap Inani.
Sappay di way Ya nginum, khadu Ya mameddohan nattay biding way.
Khadu seddong jawoh lapahni, takhuppat laju takhu, Ambin ngaliyak wad batu ngalammaw ditengah way, tikabenni takakheddik di Ya, khituk hinggani ngapapenyin ko batu ngalammaw no jinna.
Ambin ngakheddik, Ya haga nilah koni, api pay do say wad di haya-an ni no.
Api kalagi, sangun lagi ngalagok, tambah takebba mayani, api mula wad batu, kahulu khik kacukud.

Lugahni Bekhuk anak, Ya makkung panday hengngani alam wawwah jo, Kuya khadu haga bekhak tapi, mak dapok di inong ni, api kagellakhni ano hani.

"Api guway mu Bekhuk lunik, mula niku ngahaman dija" Kuya balaqno jinna menna nagu. Kimod gellakhni Kuya hinno.

"Nyak nyeppo-i Inaku, nambi nyak di tinggal koni di way jo" timbalni Ambin.

"Ditinggal koni khappa, mak ngeddok Ina say mak kahud di anak, katubbang niku nambi ngajawoh jak say khamik mula niku mak di liyakni, ya tan bugaggan mulang niku mak di dipa tiyan" timbal balosni Kimod.

"Sapa Niku la, dipa khang Mu takhu" Ambin ngababani ko hatini nagu Kimod.

"Nyak panunggu way jo,dipa wad hiliyan ni way, seggok nyak dibbah batu" timbalni Kimod.

Ambin khituk ngakhettiko cawani Kimod, kicik angon-ni, mak ngison kodo seggok dibbah batu.

"Nyak nutuq niku gawoh yu, nyak mak panday khang ni lamban ku" pangatuni Ambin.

Kimod ngahaman, benni juga Ya mak nimbal,haga nutuq nyak khappa, panday languy mawad, hak haga nutuq nyak sellom bah batu, angon ni Kimod.

"Na, mak dapok moneh kik niku haga nutuk nyak, khang mu so datas batang" ujay ni kimod.

Kattini ditinggalko kaban-ni nambi, mawad Ya putungga sapa-sapa, mula pas Ya tungga Kimod, Ambin ngangiyok haga nutuk Kimod.

"Na khadu kidah kik niku pagun nyassang, ija niku cakak ditundunku jo" ukhawni Kimod.

Buttak cakhita, Ambin diungayko Kimod juga, satemmon-ni lom hatini Kimod ngakhasa peddih ngaliyak bekhuk annak hinno, cungak khilong nyeppok Ina khik kaban-ni say ninggalko Ya.
Ambin cakak ditundun-ni Kimod, kidang khappa Kimod haga languy, Ambin takusukh jak tundun-ni Kimod, khanno juga sappay moloh-moloh.

Khadu buminggu Ambin pujama Kimod, Ambin mulay takellay camakkod ditundun-ni Kimod, Kimod bettik hati katutuq nalom ngababang, Ambin khisok diajaqni languy khik mamayinan di way, Ambin mak lagi ngakhasa mangi, kak wad kani-an tiyan khuwa hawo-an, kapan mak saliya-an, na tapok saukhaw-ukhawan.

Jak khani mid minggu, minggu mid bulan, khanno khadu benni ni tiyan khuwa pujama, macam-macam hingga khik tikkah ni tiyan khuwa, bugukhaw lalang waya, wad tattangni sawada-wada-an, na hak khigu moneh, makhi sabetti-an luwod.

Mak tikhakhasa Ambin khadu balaq, Ambin tanno khadu makhanay, mak lagi ya ngingokko Inani, Ya khadu lupa di umbaw khik di khupa ni kaban-ni dinana.

Musim kamakhaw tahun hijjo hunjak sassakni jak kamakhaw khuwa tahun say likud, waktu Ambin putungga Kimod dinana. Tanno kamakhaw bani, kani-an mulay payah seppo-an ni, kayu lamon ngaliyang ulih khadu saka mak kenna labung.
Ambin tukhun jak atas batang, Ya ngayung-kayung ngukhaw Kimod, Kimod lagi basani malaway.

"Sabay, sabay Kuya, dipa niku" Ambin nyeppok dalih ngukhaw khikni, say mak bakhih yaddoda kuya balaq say gellakhni Kimod so.
Ulih khadu sahaluwan khik katti ni tiyan khuwa putungga, makkung wad siyang, mulani-wad tiyan khuwa no goggoh jamma musabay, khanno da sakking bettik ni.

"Khappa, wad juga kodo lawayan so" taguni Ambin.

"Na mawad sabay, jak jinna makkung juga ngahalu" timbalni Kimod.

"Ajo nyak ngusung buwah cangkuwang, cakak niku, kik lawayan kalalah, lapah kham tandang gawoh" ajakni Ambin.

Kimod cakak jak way, hanjak hatini nakhima buwah cangkuwang tangusungni Ambin, kidang gellakhni la bekhuk, kippak khadu jak nganik, pagun juga Ambin ngagaga bagiyan-ni Kimod.

"Haga tandang dipa pay kham khuwa" tanyani Kimod di Ambin.

"Lapah kham nattay way jo meddoh, nyak jinna mak sanghaja nengis Patak halom hulu Pattun" timbalni Ambin.

"Ya api moneh say khadu di pattun ko Patak halom hulu no" Kimod ngalagok.

"Makkung moneh matilah, kidang kik pangkhattiyan ku, tiyan khuwa matunang lagi wad saseggo-an" hani Ambin.

Ambin ngahaman sakhabbok, payah Ya ngingok-ingokko pattun-ni Patak no jinna, mak benni jak siya Ambin muttal kahanja-an khik ya cawa,

"Na, kuingok ko tanno" makhi Ambin tapok pattun nawak bunyi ni Patak jinna, khajjo pattun-ni:

Kutottong anjak tebbing
bakhis goh jakhi kekhkha
bettong nganik say kuning
khusia kham dinana

Lamon bulapis-lapis
Kik tikulik batang ni
Kak tengngan ni ya nimbis
Khukkak mak ukhung lagi

Batang tuwoh biding way
Wad moneh say dillom Las
lagi kumbang ya ngaway
balaq sakhungni tikkas

Bulat layin kakhikkil
isini lamon nihan
dang lupa ya tisissil
mak khawan kham lollonan

"Na, khanno da Sabay pattun-ni Patak so jinna, khappa kik hamu Sabay, buwahni api pay say jadi saseggo-an-ni Patak khuwa matunang no" Ambin bukoddo di Kimod.

"o..o..buwahni apiddo, ano" mak kejjungga timbalni Kimod, kattu ya khadu tapok podokh hulu ngatatedduh pattun ni Patak no kakhu.

Satottong-tottongan tiyan khuwa musabay, makkung dapok di tedduh tiyan khuwa khusiya ni Patak halom hulu tukang pattun-no jinna.

Tiyan khuwa muinday, Ambin jama Kimod, minjak jak khang ni-tan mejjong jinna, makhi lapah nutuq hiliyan-ni way meddoh.

Laju mameddohan, lapah dalih bubabah, cungak khilong tiyan khuwa ngapapenyin ko khicci-macamni say tuwoh biding way no, hippa wad say makuning cutik tapok tiyan khuwa putatinday. Sappay diddoh Kimod ngalagok, kicik hamma-ni, mati wawwah pay dunia dija-jo, hani. Kippak hunjak tuha Ya jak Ambin, khupani Kimod makkung wad lapah jawoh nattay way no meddoh. Sumang jak isud-isud lapahni kik didakhak, batu diway no pubalaq-balaq, payah Ya nyellak ko badan dihiliyan-ni way tulung, khang ni languy mak mabekhak, mula paidokhan-ni mak majawoh.

Khanno jawohni lapah, khik khadu sanemmon putatinday, makkung juga tiyan khuwa ngahalu api say di pattun ko Patak jinna.

Di kikhi kanan-ni way mak lagi ngaliyak batang kayu say balaq, mak bakhih say panjak kalayin jak kheppong gayaw khik khakh-khah kayu cambay.

Mawadda tiyan khuwa panday hak kheppong gayaw bekhak no khadu kheddik jak khang ni Jamma budakhak, nuwakh ngusi nyani khang butatanoman ya tanohni mulay ngagalih, ti tinggal ko, titaganko limuk, attan-ni kik khadu hellau luwod tiyan moloh disan kippak mennah butahun ben-ni ni. Samakkungni moloh khang saka no, tiyan ngabukak dakhak sumang say tanohni lagi buyun, mulani dunia disan khadu kaliyaan pangga.

Ambin jama Kimod buindom mejjong bah khuppun gayaw, makkung bettik habuni, tiyan khuwa dikanjat ko bunyini batang khukkak.

"Bunyinapi ano Sabay" siyah ni Ambin di Kimod.

"Induh, kattu cakak pay niku di batang gayawno " hani Kimod.

Ambin cakak di batang gayaw, kidang kukhang langgakh Ya mak dapok ngaliyak api-api, makhi Ya luccak mid batang kadundung pullan say ninggam batang gayaw khangni jinna. Jak jawoh Ya ngaliyak wad Liman nunggal lagi sanemmon ngambuk-ambukko batang gayaw say di hak unggak, induh ngulam induh Ya ngamuq, makkung kapandayan, kattu Ambin bugaggan tukhun ngeddi Kimod.

Ambin appay mejjong banjakh Kimod, hak makking Liman balaq jinna, mak benni jak siya, ngagukhuh bunyini, bang kikhani kaban-ni khatong ngeddi Liman nunggal jinna, magingguk alam kapellok, kuccak lattak api say daladni.

"Bacak kita khuwa malih jak ija jo" hani Kimod.

"Niku bangik, dapok luccak datas batang, kik nyak dilik ko tiyan, na tuppak khicit" cawa laju ni Kimod.

Mawad timbalni Ambin, kattu tiyan khuwa bugaggan malih jak iya, mepekh tan khuwa nattay biding tulung no jinna.

Pagun seggah hatini tiyan khuwa muinday ulih dikanjatkan kaban-ni Liman no kakhu, Kimod haga sellom kidang mak di kenni Ambin, tattu mangi pangkhasani kik Kimod seggok bah batu lom way no.

Bulinduq baling batu balaq, khadu asuq baccong kik hak pangkhasani tiyan khuwa, makkung moneh maben-ni tiyan khuwa seggok, kuk badan-ni Ambin lagi gagettay goggokhan, tiyan khuwa moloh takanjat nengis khakhatting patoh kenna ilik, na tapok khituk, cungak khilong tiyan khuwa, Liman jinna kodo say ngakheddik no hani Kimod.

"Api ano sabay, induh kik kabanni Liman jinna kodo say khatong no" hani Kimod.

Makkung kuk Ambin nimbal, mak di hakhiko tiyan khuwa wad Baning balaq tukhun jak hak tundun-ni tiyan khuwa no.

"Waw, mati balaq kanjatku" hani Kimod.

"Niku khattini say lapah di hak isan-no jinna" cawa lajuni Kimod.

Kimod panday di Baning no kakhu, tiyan nangun dapok sainongan, khik nangun tiyan lagi muakhi, kahni Kuya hukhik di way, makhi Baning hukhik didakhak.

Talipang pay cakhita, seddong sakani Baning mak tungga Kimod, ngalagok ya ngaliyak puwakhini, kasaka moneh Kuya nginday ko Bekhuk, hani hatini.

"Acak niku dija, biasani lapah mu mak majawoh" taguni Baning si Kuya dakhak no.

"Na kejjung pay cakhitani mula sikam khuwa jo togok dija" timbalni Kimod.

"Layin pay, ija pay niku" Baning no jinna ngukhaw Kimod.

Kimod khatong ngakheddik di Baning, jawoh juga khang ni tiyan khuwa ngicik, katutuk cawa hamma, mula Ambin mak nengis api say di kicik-ko tiyan khuwa muwakhino.

Khupani baning no jinna pagun ngalagok api mula wad Bekhuk pujama Kimod.
Kimod mulay nyakhita, jak awwal mulani, jak pakhtama ya ngahalu anakni Bekhuk, buwah kuning say goggoh jakhini kekhkha, kuk tiyan khuwa seggok ulih ngaliyak kaban-ni Liman, di ujay ko Kimod jama Baning no.

Mak ben-ni tiyan khuwa bubabah, Baning nangguh di Kimod, sakhaduni ya jak nginum, tapok ya lapah cakak jak way, kidang appay pikha ngajippang ya kesekh jak ya, ngakhilong ya haguk Kimod say khadu moloh ngakheddik di Ambin, makhi ya cawa;

"Dang kutti khuwa khabay di Liman-no mawad hak tiyan nyadang, mak ngebba haga ngagayah, khik nangun kham mak sagayahan" khanno cawani Baning.

"Ya khayya kodo, nyak la khabay katubbang dilik koni" timbalni Kimod.

Mak lagi hak wad timbal balosni baning no jinna, mak lagi ya butatanya lom hati, kattu ya tapaccok potokh ngalajuko lapahani.

Khanno moneh di Ambin, ya tukhun Baning malih, gelekhan-ni say ngulih-ulih jama Kimod. Ya attan-ni Ambin khadu pappan nengis cakhitani Kimod, Kimod ngajak Ambin ngaliyak-ko buwah kuning say goggoh jakhi Kekhkha say di pattun ko Patak so jinna.

Kimod panday jak Baning, buwah kuning saseggo-an ni patak so, bang kikhani buwah ni putti gayaw, jak jinna tiyan khuwa ngaliyak, kik hak buwah ni gayaw, kidang mahujaw mula mak di pakhingoh ko tiyan khuwa.

Kammakni hujaw kik putti matah.

"Lapah tutuq nyak" Kimod ngajak Ambin.

"Mid dipa" Ambin nimbal.

"Ano babah so kham haga nyeppok seggo-an-ni Patak so, nyak khadu panday tanno" timbalni Kimod.

"Na payu kidah kik khanno do" balos ni Ambin"

Kimod khik Ambin cakak nutuq sakal, Kimod ngingokko lohotni Baning jinna, kik haga panday khangni gayaw say buwahni messak hani, tattay kutti khayya sakal dunggakno, kik ngahalu batang lissuh, disan sakal cabang khuwa, akuk say nyippang kikhi say laju cakak, dang kik ngakuk say kanan, disan khangni Babuy ngubang.
Sappay dikhang, dihalu tiyan khuwa batang ni gayaw so khadu patoh, kik mak Uccal, Babuy say jak nakhanggawni.
Buya pangkhasani Kimod cakak pumatang bang sappay diya hahanani tinggal say khik kapellok lagi, akik hinno makkung bettik messakni khik khadu di henna Putit.

"Khawan kita khuwa jo" khibokni Kimod.

"Khattini buwahni gayawno seggo-an-ni patak so, khisok ga nyak nganik lagi lunik tumbay" hani Ambin.

"Dipa kidah kawayni,"

"Dipa say goggoh jakhi Kekhkha so kidah" Ambin cawa nanggalan.

Kimod ngakhilong batang gayaw bakhih say buwahni lagi matah, di khiyapni papikha khuppun say mak jawoh jak isan, makhi ya cawa;

"Udi api say nimbul di pucuq ni gayaw di, halok huddi kawayni so" Kimod nunjukko sombong ni gayaw.

"Ya tukhun jadi buwah bawakni lekkak, kidang mak jadi buwah unyin, udi say dibbah nidi pagun ngaway" Kimod ngalagok bakhong ngaliyak tadukni.

"Buwahni bikkuk mid hak atas, kik tipenyinko goggoh jakhi naku" Kimod ngatatottong jakhini Ambin.

Mak takhu Kimod ngaji-aji buwahni gayawno, kidang ulih sanangun tuwah ni pacak, mula hak injuk dihaluni sakiman-ni Patak so jinna, sumang Jak Ambin, ngalah-ngaduh ya ulih mak kabagiyan gayaw messak no, dipa nangun khadu bettoh.

Lattakhan khasa bettoh say mak katahan, tiyan khuwa musabay bugaggan malih jak ya, laju lapah cakak mid babbu sakhakkungni pumatang lunik no.
Sappay datas, tiyan khuwa musabay ngahalu huma tittok, khupani sakeddaw dakhak hinno khadu malih jak isan. Kidang mak siyal ga, tukhun mak benni jak pukhakhiyap tiyan khuwa ngahalu batang geddang say tuwoh kheddik anjung di dakhak hinno, kabennokhan wad buwahni say messak.

Khadu sabingi kabiyan Kimod mak nungga way, khituq hinggani, pusang, dipa mahu, hahanani say jak di kanikni yaddoda geddang messak nambi manom, akik hinno makkung dapok ngalebbonko khasa mahuni.

Kimod ngagukhah Ambin say pagun camakkod peddom di batang geddangno, lagi dadokha-an sukkan baccong hinggani haga khaggoh jak ya, kidang ulih mak dapok mak, Kimod khadu lapah menna ninggalko ya.

Sappay dibbah, khadu dibiding kebbun, tiyan khuwa musabay ngahalu khanglaya ni jamma pakhulang dakhak, tinggal luyudni lagi, khanno da sakking bennini dakhak hinno mak tikhakhuwang.
Lapah tiyan khuwa musabayno nutuq luyudno jinna, laju-laju, takokkoh ngahalu way, seddong balaqni way hinno, layin lagi hak tulung, katutuq khellom moneh. Hanjak hatini Kimod tukhun nungga way, tuppak sellom ya disan, languy mak lejju-lejju.

Ambin jinna-ni makhanoq khayya dibiding way no, kidang ulih ya ngaliyak khik ni sanemmon mayin way, ya iya tukhuk moneh.

Kanemmonan bagukhaw, mawadda hak dihakhiko tiyan khuwa musabay, kik tiyan khuwano khadu di hanyutko way meddoh.

"Liyak pay sabay api gellakhni huddi" hani Ambin cawa jama Kimod.

"say hippa moneh sabay" timbalni Kimod.

"Na, huddi da say gellakhni Jamma so" Kimod ngalajuko cawani.

Ambin pu-kakalagok ngaliyak tuppahni Jamma, salama hijjo makkung wad hak pu-huk di manusia kippak pissan ya.

"Jamma" Ambin lagi ngalagok.

"Iyu, mak dingok-ko kodo, khang kita khuwa nganik geddang nambi, geddang nambi so mawad kik hak tuwoh nanggalan, mula ya tuwoh di ya, Jamma no say nanom ni disan" kejjung juga timbal ni Kimod.

"Haga api la mula Jamma no nanom geddang disan" Abin pagun ngalagok.

"Jamma bubukak disan, nuwakh-ngusi nyani khang butatanoman, macam-macam say ditanom ko tiyan, mamulani pay nanom pakhi, kik lagi basani ngisi pakhi tanoh say di bukak tiyan-no, dakhak gellakhni, kidang kik ya khadu leppas jak ngagettas, khik di tanomi-tan tatanoman bakhih, kebbun gellakhni" ujay ni Kimod kejjung baccong.

"Na, cutik lagi mak lupa, di kheddik batang geddang nambi so wad anjung, anjung no disani Jamma pakhattini tiyan buindom, khang tahabu kak lagi basani duma, kakala moneh tiyan minok disan, kik tiyan minok, gellakhni bu-umbulan, na, khappa ben-ni ni tiyan bu-umbulan disan, anjung no jinna jadi lamban-ni tiyan" sambung ni Kimod.

Ambin languy mid hak biding way, bagayud di bakak ni kakhinjing, makhi ya luccak di batu, mejjong ya disan, Kimod languy khayya nyeppok way say kakkah, ya sappay di biding, kheddik khang ni Ambin mejjong jinna, ya ngajungaw ko huluni luwah jak way.

Munggak meddoh pubalahan-ni tiyan khuwa musabay, dalih ngapapenyinko kaban-ni jamma say lagi basani duway no, wad say lagi sanemmon nottos kayu sabun pakay moppoh, wad moneh sanak mandi khik mayin way.

Mawas khani, say-say babbay malih jak pakkalan mandi, wad say nyuccun poppohan khik nguttay ko bakhunuq ngisi way, wad say nyakhaddang pakhuh, pakay ngulang ko way so.

"Sabay udi wad say lunik" ambin bukoddo di Kimod.

"Say lunik di, anak ni tiyan" timbalni Kimod.

Ambin ngahaman, lattakhan ya ngaliyak wad babbay mappam anak, wad moneh say nawid anakni mulang jak way no, khatong ingo-an ni Ambin di Inani, hatini tapok sebbik khanno khadu sakani ya mak putungga di Inani, kidang mak benni Ambin magoh, ya takanjat ulih di sakhabbu Kimod makay way, api mula ti ukhaw-ukhaw mak nimbal hani Kimod.

"Ngalagok nyak di niku sabay" hani Kimod.

"Ngalagok dapi moneh kidah sabay" Ambin nimbal.

"mak biasani niku magoh, lapah kita khuwa cakak nutuq khanglaya ni jamma mulang jak way no, sapa panday kham ngahalu kani-an" Kimod ngajak Ambin.

"Na lapah moneh" timbalni Ambin.

Lapah puikhing tiyan khuwa muinday cakak jak way, pagun nattay khanglaya pakhattini Jamma disan lapah duway.

Pekkon lunik say kah papikha ngalamban disan, pakhwatin ni hukhik anjak hasil butatanoman, sumang jak pakhi dakhak, gagulayan, kikim khik putti say ditanom ko tiyan, say jadi kani-an ni tiyan sakhani-khani, kik tiyan makhattok gulay Iwa, tiyan nangun makheddik jak way balaq, lamon macamni lawayan disan.

"Bapak, ajo way mu dija" Kimod nengis wad anakni Jamma cawa.

"Iyu, pik-ko disan khayya nak yu" Bapakni nimbal.

Jak jawoh Kimod ngaliyak sanak bakas tanggung nyakhaddang tippung ni taw kagalah, tijalin makay huwi, bettik goh anyamni, di huluni tippung pakayni way nginum no kalubang pakhatti nyossoh khik nuwang ko way,lubang ni tisulun makay kakhakhasni putti nyin ya mak takuppah.

"Api la Bapak guway mu" sanak hinno jinna nagu Bak ni.

"Ngali anakni putti, nyin titanomko kham, ija kidah niku, tulung pay Bapak ngakad anak ni putti jo" Bakni sanak hinno ngukhaw ya.

Kimod nyambang jak baling talos say mak jawoh jak khangni Jamma khuwa mu-anak no, di penyin ko Kimod, cakhani tiyan ngali togok di nanomko anak ni putti no jinna, hani hati ni Kimod, kammak ni bettik tuwohni gayaw dija jo kik wad say nanom khik say ngandan-ni, hani.

Khadu bubilang bulan Kimod jama Ambin pukheddik di gelung-gemalay ni manusia disan, mak ngeddok say bukhubah di akkon-ni tiyan khuwa, pagun goh ayukni, sahawok di kani-an, saseppok kik mak saliya-an.

Pikha khani jak isan, Kimod mulang middi pakhattini tiyan khuwa Ambin buindom, ya ngusung baha uccukni putti samulli tanghaluni jak payuyyuhan-ni jamma, di ukhawni Ambin, ija niku, ajo nyak ngahalu putti messak hani Kimod.

Ambin ngakhilong haguk Kimod, makhi ya cawa:

"Putti, ano buwahni gayaw say diusung" Ambin ngalagok.

"Kasaka dikhani so, nyak nengis Jamma cawa, gayaw dija jo gellakhni putti" timbalni Kimod.

Mawad hak kejjungga pubalahan-ni tiyan khuwa muinday, kippak lagi pupakhadda ngalagok, kattu tan khuwa so tapaccok saugay-ugay niwadko putti sang baha lunikno jinna.

Tiyan khuwa mukhkhik lagi basani nganik putti no, hak taliyu kekhkha sanga kaban, takhu jakhuni kekhkha so, khik ya cawa:

"Liyak kutti pay bekhkhuk nunggal huddi-di, ngekhkhik-ko kuya" hani kekhkha kalabay no jinna.

"Udi tiyan khuwa di, hawo-an nganik putti" hani say bakhih.

"Kik nyak, kukanik-kanik nanggalan" say bakhih moneh nimbal.

Kidang uttungni mak benni kaban-ni kekhkha so ngamamayuh Kimod khik Ambin, gimbol tiyan sahahenna-an bugayud khik luccak datas kayu, laju mid hak unggak.

Mak benni jak siya, gamunuy puikhing-ikhing caccah jak luppak way, takhu moneh tiyan tukhun ngahakhi ko Kimod khik Ambin, putatinuk tiyan jak atas batang ngapapenyinko tiyan khuwa mukhkhik.

"Wuy-wuy, layin kik huddi di bekhkhuk kodo, khappa pay pangliyak kutti" hani caccah say pakhtama ngahakhiko Ambin.

"Udi ya pujama kuya" say bakhih cawa moneh.

"Halok ya diambin ko kaban ni, mula ya nunggal disan" timbalni caccah bakhih.

Kidang khawan ni, mak benni moneh caccah khamik no jinna hak malih.

Ambin ngalagok khik butatanya lom hatini, acak nyak jo diucak ko tiyan bekhkhuk nunggal, hani. Injuk haga di utah koni luwod putti say dikanik ni jinna, talemmos badan ni, haga nahok, nahok jama sapa, laju nongokh ya bah kakhinjing no, say ngebba ni Ya busuya, Iya diucakko caccah jinna, di ambin ko kaban ni.

Lagi mak kanattuwan pangkhasani, hak magingguk pucuq ni kakhinjing khang ni buindomno, bakhong ya cungak, diliyak ni giguq sangakaban bekhkhak.
Sabennokh ni kaban ni giguq no mawad panday hak wad bekhuk dibbah kakhinjing no, Kidang ulih Ambin khadu khuwa kali diwada kekhkha khik caccah sanga kaban samakkungni, ya mak dapok lagi nahan hati, tapaccok kabaniyan ya cakak mid di pucuqni kakhinjing no, dipupuh ni giguk khamik no jinna.
Kakhabayan laju ngebbas, tabokh citakh kaban ni giguq so.
Yatukhun khadu jawoh, tukhun tiyan messon luwod, cawa jakhuni:

"Kik pangliyak ku say mupuh kham jinna no bekhuk, khappa pay pangliyak kutti" hani.

"Yu nangun bekhuk la" giguq say nimbal.

"Kidang api pay salah kham mula ya kasitanan" giguq nganak lunik cawa moneh.

Ngalagok sanga kaban, togok manom khani Giguq khamik no jinna pagun khayya butatanya mulang tiyan, apiddo ngebbani mula Bekhuk nunggalno jinna ngapapupuh tiyan.

Pagi khani Kimod mulang jak tandang, diliyakni Ambin mejjong di baling bakak ni kakhinjing, kicik angon-ni Kimod, mak mayukni ano nongokh khanno, bang injuk sakhingok.

"Sabay, api guway mu disan, ija niku ajo nyak jak ngahayu limus" Kimod menna nagu.

"Kanik-kanik niku, mak nyak ngagunako limus no mawad" timbal peggak ni Ambin.

Kimod seggah, cutik lagi mak takacay limus say di bekkomni, ulih nengis timbal ni Ambin. Api pay do guway ni ano mula hak pagi khani tuppak nahok, Kimod butatanya lom hati, khanno khadu sakani tiyan khuwa pujama, makkung wad timbalni Ambin say goggoh khanno,

"Api la guway mu, ti ukhaw bettik-bettik mula hak khanno timbalmu" Kimod tapok sakuk.

"Yapi mak dingok ko kodo cawani Kekhkha nambi, kik niku wad kani-an, kanik-kanik nanggalan, dang dihawok ko di nyak" timbalni Ambin.

"Nyak jo Bekhkhuk nunggal, mak tanggom nginday ko Niku, mak ditengis kodo cawani Caccah nambi, nyak jo khadu dittok ko hulun Tuha-Puwakhiku, mak gunamu ngapakhingoh ko nyak" timbal lajuni Ambin.

Mawad timbalni Kimod, tanno ya panday api say dikhasa ko Ambin, liyom, sakik dihak udi ni sakik, sakik mak ngidok bandingni, kik hak temmon do ya di ambin ko kaban-ni, khadu pay nunggal hukhik nanggalan, bakhong nginday ko Kuya say induh kajajinis ni, lamon hulun say mak demon.

Kimod pagun ngahaman, mawad timbalni kippak sanga patoh, niyat ni ngahayu Limus jinna haga ngahawok ko Ambin, minjak semawas Ya kattubbang di henna Jamma, bang sumang say dihaluni tukhun Ya mulang, Ambin mulay takenna di kicik tahok khik hasud ni Kekhkha khik Caccah so, nambi.

"Ajo Limus so kuppik ko say, kik niku khadu bettoh kanah akuk khayya dija" Kimod cawa jama Ambin, makhi ya laju lapah mid biding way.

Sappay diway Kimod mejjong di bah batu, tukhun Limus say dikanikni bella laju Ya sellom di way, mak tattu kik ilung ni, kattu ya haga ngalalillaw ko hatini ulih lattakhan ngaliyak hingga khik kakhiloh ni Ambin say mak bukenna di Ya.

Ambin khanno moneh, malih ya jak khang ni nongokh jinna, lalajuwan munggak nuju pullan say wad di duwakhani pekkon no, say biasani tiyan khuwa musabay mak khippak ninday kebbun putti ni jamma disan, kik mak, tandang di payuyyuhan kudan lamban, tanno bettoh mak dikhasa Ambin lagi, angon ni mak kanattuwan, dicadang ko kicik tahok ni hulun.

Lattakhan hukhik nanggalan, khasa mangi khik sebbik mak dapok ditung-ngitung ko Ambin, mak ngeddok lawan bagukhaw, mak ngeddok khik say ngunggukh Ya cawa, haga moloh nunggai Kimod Ya liyom.

Lessoh nyossoq lom dada, tahili luh mak dikhasa Ambin kapan ya tabitta di Ina ni, mati khawan bagiyan tukhun di lambung Bumi, sossol mak juga bella ngabiti badan tumban.

Kutiti jambat awi
Mayan ngukha kabellah
Khuguy hati kik nandi
Kattu patoh ditengngah

Lapah lom bingi kellom
Mak nattu haguk ilung
Say panjak badan kakhom
Khawan kik wad say nulung

Ngajippang mak tikhasa
Badan happang hayungan
Tanemmu bang khajjogga
Induh haga hakhungan

Khanno pay umpamani, hiwang ni Ambin nyossoli dikhi, ngalimak ka-ungayan kidang induh disapa, khanno khamik khik khadu lamon ni Ya putungga makhluq dilambung bumi jo, kippak say nim-mak, say haga makhingoh ko Ambin, malahan ngamamayuh khik ngalalang ko Ya.

Khappa Bekhkhuk nunggal soddo, mejjong bah batang nanggalan, kah ni tanno mak lagi cungak khilong, magoh ngahaman ngangon ko tanemmu ni di lambung bumi jo.

Khadu bella pubabanding, pagun juga ta-ulang di Kimod angon ni, mak bakhih mak sapa lagi, mak khuwa mak telluni, Kimod noddo say haga ngungay ko Ya, lawan ni bagukhaw, khik ni sagaga kani-an, khanno pay angon ni Ambin.

makkung khadu ......