JAJAMA NGANDAN

Khik Kattik Inday Kacca, Mulli Mekhanay Sanak mengukha, pelajar mahasiswa, pagun liyom cawa Lappung di kekhami an, di pasakh, di angkot, di kampus ..........?

Kik bahasa Lappung mu lebbon haga tiseppok dipa, haga nyalah ko sapa ?

Reformasi tilapahi kham khadu papikha tahun, ngatas nama ko demokrasi, unggal warga khadu ngeddok kebebasan ngeluwah ko pendapat, protes, togok di ngewada pemekhittahan, mak lagi khabay-khabay, mak lagi watekh di tinjuk Plisi kik jak nyendekh ataw ngewada Presiden, hinno tanno sisi positif ni reformasi say dapok ti khasa ko kham jejama.

Api hubungan ni reformai jama budaya Lappung ?
Reformasi say di tutuki otonomi daerah, ngenni cukup ruwang gerak di perkembangan budaya Lappung, api lagi pemekhittah provinsi say dipimpin Gubernur dapok jadi pelopor khik penggerak bangkit ni budaya Lappung say selama hijjo, injuk hukhik injuk mawad.
Kepeduliyan ni pemekhittah provinsi jama budaya Lappung, yaddo da jadi penattu, maju mawad ni budaya Lappung.

Tugu sigokh say luwah anjak ide khik pemekekhan ni Bapak Syahruddin ZP selaku Gubernur Lappung dinana, jadi say bukti, kepeduliyan ni pemekhittah provinsi jama budaya setempat(Lappung)

Dapok ti bayang ko kham, seanday ni Gubernur mak peduli di budaya Lappung, katutuk moneh DPRD ni peddom mata, mak ukhung, layin hattak bahasa, kuk budaya Lappung say bakhih dapok tipasti ko haga lebbon, api mak khayya, di era reformasi jo unyin ni ngekhasa bebas, nasionalisme pelaleggohan tikkas, say luwah /cakak kesukuwan, say ngekhasa suku ni paling lamon, tahambung. Mak lagi peduli di bumi khang ni tiyan takhu, khang ni tiyan usaha, khang ni tiyan hukhik selama hijjo.

Say paling panjak tikhasa katti ni reformasi, say layin suku Lappung mak lagi mekhingoh ko budaya Lappung.

Say moneh cittu, mak peduli ni suku bakhih jama budaya Lappung, semakkung ni reformasi, papikha Radio swasta say wad di tanoh Lappung jo, lagi haga nyettel ataw motokh ko laggu Lappung, ya tukhun reformasi, na mak lagi, halok hijjo sisi tahok(negtif) ni reformasi.

Khappa di media audio visual ?
Di tanoh Lappung jo khadu wad papikha stasiun tv swasta lokal, malahan wad say bani makay gellakh(nama) Lappung, kidang, kanjak pekhtama siyaran togok tanno, makkung ngeddok acara ni say khusus/spesifik haga ngiwak ko budaya Lappung, misal ni bekhita say bubahasa Lappung, api lagi sinetron bubahasa Lappung, lagi tangih khik jawoh.

Stasiun tv say bakhih dapok juga jadi ubat, tiyan haga nayang ko klip laggu Lappung, kidang kah tak laggu so do, makkung moneh ngeluwah ko bekhita bubahasa Lappung.

Unggal nayang ko siaran langsung(live) khusus ni acara musik, stasiun tv lokal say wad di Lappung jo mak sekali haga ngukhaw/ngundang penyanyi ataw artis(rekaman) laggu Lappung. Padahal penyanyi laggu Lappung say khadu wad jak rekaman lamon bilangan ni.
Hinno say lagi bukti, tiyan mak peduli di budaya Lappung.

Moloh di bahasa Lappung, layin pissan minduwa, khadu khisok kham nengis bahwa tanoh Lappung jo massa julukan indonesia mini, disebab ko lamon suku bakhih say takhu/hukhik di Lappung jo.

Sebennokh ni, indonesia mini no doktrin say luwah semasa rezim orde baru bukuwasa, tujuwan ni kenyin warga say hukhik di tanoh Lappung jo, makay bahasa Indonesia, malahan dapok jadi, julukan indonesia mini no, salah satu cakhani penguwasa dinana ngalebbon ko bahasa daerah say suku ni kah cutik(minoritas) termasuk kham Lappung ? dapok jadi, asal kham haga ngingok, rezim(sistem) orde baru nyeppok cakha ngejadi ko Indonesia jo say suku, wad ni transmigrasi besar-besaran, ngatasnamako pemerataan kesejahteraan, masyakhakat jak tanoh jawa khadu pakhik(dipa-ipa) di sebabekhak ni nusantara jo, kik khadu khanno dapok ti tedduh(tebak) Indonesia jo jadi negakha ni sapa.

Mak dapok ngilak, situasi khik kondisi say goggoh khanno ngejadiko suku asli say jadi tujuwan transmigrasi jadi terdesak ulih kalah jumlah, khusus ni, tanoh Lappung say massa julukan indonesia mini, laju tambah sassak, doktrin hinno tanno nyadang di suku Lappung, khappa mak nyadang, menggakhik cutik goh jak pekkon ni, jamma Lappung jo khadu mulay bubasa Indonesia, ngekhasa bangga, gagah, halok malahan ngekhasa hebat, kik dapok bubasa Indonesia.

Ulih khadu takenna di doktrin indonesia mini no, uccuk-uccuk ni mak lagi bangga bubasa Lappung, togok di anak uppu, jak lunik mak lagi cawa Lappung, khusus ni tiyan say hukhik nyellang ataw say takhu di kota, padahal kik haga, ya di lamban ti tawway anak kham cawa Lappung, api say mak dapok. Kham senemmon makay bahasa Indonesia, kidang suku bakhih di tanoh Lappung jo pagun makay bahasa daerah ni tiyan tenggalan.

Mak ngeddok istilah sayuk asal kham haga, khusus ni sanak mengukha penekhus budaya Lappung say lagi nyeppok ilmu, Inday Kacca say status ni pelajar khik mahasiswa, biasa ni paling rentan haga jadi korban ni doktrin indonesia mini, khappa mak khanno haku, khadu jadi penakay, sanak pekkon say sekula/kuliyah di kota, emma ni mulay gonggong, cawa Lappung mulay pukakaluk.

Na, jak tanno, ti lebbon ko jak lom hulu kham doktrin indonesia mini say nyadang no, kik suku bakhih makay bahasa ni tiyan, masa kham mak ngeddok tangikhak makay bahasa kham tenggalan, bahasa Lappung.